Անգլիական ոճի ինտերիերին բնորոշ պաստառներ

Անգլիական ոճի ինտերիերը սիրված է ամբողջ աշխարհում, հետևաբար սիրված են նաև այդ ոճին բնորոշ պաստառները, որոնք այսօր դասական են դարձել 🙂

Անգլիական արտադրության պաստառների շնորհիվ մենք նույնպես կարող ենք ունենալ նմանատիպ ինտերիեր:

Գեորգիանյան ոճի պաստառներ

Սա ընդգրկում է Գեորգ թագավորների գահակալության տարիները (1714 –1830 թթ.): Այս ոճում կլասիցիզմի խստությունն ու համաչափությունը միահյուսվել են ռոկոկոյի հետ: Անգլիական արիստոկրատիայի տների պատերին հայտնվեցին դասական զարդանախշեր՝ հունական ոլորանախշեր, արմավազարդեր, ժանեզարդեր, շղթաներ: Դեկորում սկսվեցին սիրվել արևելյան ծագում ունեցող տարրերը, մասնավորապես միջնադարյան չինական մոտիվները 🙂

Ավելի ուշ դրանց միացան բամբուկի ցողունները, որոնք դարձան Գեորգ 4-րդի պատվերով Բրայտոնում կառուցված թագավորական տաղավարի դեկորի հիմնական մոտիվը: Այդ նույն տաղավարի մեկ ուրիշ մոտիվ էր վիշապը: Միևնույն ժամանակ անգլիական ինտերիերում ի հայտ եկան ծաղկանկարներ՝ թռչուններով կամ թռչնավանդակներով, նաև չինական այգիների պատկերներով:

Վիկտորիանական ոճի պաստառներ

Ոճն անվանվել է Վիկտորիա թագուհու պատվին (1837-1901թթ.): Այդ շրջանում տարածված էր պատմական ոճերի վերակառուցումը նեոգոթական ոճով: Այստեղ նույնպես կար արևելյան ոճի ազդեցությունը, քանի որ Հնդկաստանն այդ ժամանակ մտավ Բրիտանիայի կազմի մեջ: Պալատների ու արիստոկրատական առանձնատների պատերն սկսեցին հարդարվել մետաքսյա գործվածքներով ու ծաղկանախշերով, նռնանախշերով ու անանաս հիշեցնող նկարներով:

Գոթական ոճով տարված գործիչներն իրենք սկսեցին ստեղծել հիանալի բուսական նախշեր, որոնք պահպանվել են մինչ օրս:

Թագավորական իշխանության խորհրդանիշով պաստառներ

Շուշանները, Թյուդորների վարդը, տատասկափուշը, երեքնուկն ու թագը հանդիպում են անգլիական արտադրության ժամանակակից պաստառների վրա՝ զարդանախշերի տեսքով, իսկ նախկինում այդ խորհրդանիշերը կարելի էր օգտագործել բացառապես միապետական ինտերիերում:

Վանդակներով ու զոլերով պաստառներ

Եվս մեկ ժամանակավրեպ թեմա: Գեորգիանյան դարաշրջանի դասական ինտերիերում հայտնված զոլերը հասել են մինչև մեր օրերը: Դրանք եղել և մնում են աշխատասենյակի կամ գրադարանի հարդարման հիմնական մոտիվներից, և սովորաբար, օգտագործվում են զուսպ գույների զոլեր: Իսկ առողջարանային քոթեջների համար, ընդհակառակը, ավանդաբար ընդունված են բաց գույները կամ հակադրությունները, ասենք՝ կարմիրը կամ կապույտը սպիտակի հետ: Ժամանակակից դիզայներները զոլերի հետ վարվում են այնպես, ինչպես ուզում են՝ սեփական հայեցողությամբ պաստառներ են ձևավորում տարբեր գույների ու չափսերի զոլերով:

Նույնը վերաբերում է նաև վանդականախշին: Շոտլանդական խորհրդանիշը սկզբում միայն հաստ բրդյա գործվածքի վրա էր հանդիպում: Ժամանակի ընթացքում վանդականախշի կիրառումն ընդլայնվեց, և այժմ այն բրիտանական ինտերիերիային ավանդույթների անբաժան մասն է:

Ծաղիկներով պաստառներ

Անգլիական ինտերիերում ծաղիկների թեման անսպառ է: Բրիտանացիներն այգեգործություն շատ են սիրում, և զարմանալի չէ, որ բոլոր ժամանակներում ու դարաշրջաններում անգլիական ինտերիերի պատերին հայտնվում էին այս կամ այն տեսակի ծաղիկներ՝ նռնենու կամ սակուրայի, վարդեր կամ քաջվարդեր, հասարակ կակաչ կամ գնարբուկ:

Բազմազան էին նաև ծաղիկների պատկերման եղանակները՝ ուրվագծային զարդանախշից մինչև իրական նկարներ: Դրանք լինում էին խոշոր կամ մանրանկար, փնջերով կամ առանձին, շարքերով կամ վանդակավոր դասավորությամբ, մուգ կամ բաց ֆոնի վրա:

Այսօր ինտերիեր ձևավորելիս կարելի է ընտրել ամենատարբեր բուսական նախշերով պաստառներ ու չմտահոգվել, թե դա լոկ կանացի մոտիվ է: Նկարի ու գույնի ճիշտ ընտրության դեպքում բուսական նախշերով պաստառները շատ լավ կսազեն նաև տղամարդկանց սենյակներին կամ աշխատասենյակներին 🙂