Դեկորատիվ սարդոստայն՝ սեփական ձեռքերով
Չնայած խանութներում առաջարկվող դեկորացիայի բազմազանությանը՝ շատերը նախընտրում են բնակարանը զարդարել ինքնուրույն պատրաստած դետալներով:
Բրդյա թելերից հյուսված այս դեկորատիվ սարդոստայնը պարզ ու հետաքրքիր կոմպոզիցիա է, որը կարելի է ամրացնել թե՛ պատին ու թե՛ պատուհանին:
Դեկորատիվ սարդոստայնի համար անհրաժեշտ է՝
- հաստ թել (օրինակ՝ բրդյա),
- մկրատ,
- ներկարարական սկոտչ կամ այլ կպչուն ժապավեն:
- Պատրաստում ենք սարդոստայնի հիմքը
Սկզբում վերցնում ենք 3 կամ 4 թել ու դրանցով ձևավորում ենք սարդոստայնի հիմքը: Թելերը պետք է կենտրոնում հատվեն, իսկ ամրացնել կարելի է սկոտչով կամ մեխով: Ամեն մի թելը, կենտրոնում հատվելուց հետո, ամրացվում է արտաքին եզրին (այսպիսով երեք երկար թելից ստացվում է հիմքի վեց թել):
- Ձևավորում ենք դեկորատիվ սարդոստայնի օղակները
Հետո անհրաժեշտ է լինելու երկար թել՝ սարդոստայնի հանդիպակաց մասերը հյուսելու համար: Հանդիպակաց ու երկայնաձիգ թելերի հատման բոլոր հատվածներում պետք է ամուր հանգույց անել, որպեսզի թելերը չփախչեն:
- Կտրում ենք ավելորդ մասերը
Այսպես շարունակում ենք հյուսել մինչև սարդոստայնի վերջը: Վերջում կտրում ենք բոլոր ավելորդ թելերը: Սարդոստայնի օղակները կարելի է ձևավորել միմյանցից հեռու կամ մոտիկ՝ նայած, թե ինչպիսին ենք ուզում, որ լինի:
- Պատրաստ է
Սարդոստայնի չափսը կախված է նրանից, թե որտեղ եք ամրացնելու: Հետաքրքիր տեսք են ունենում տարբեր չափսերի սարդոստայնները: Կարելի է օգտագործել նաև գույնզգույն թելեր. այդպիսի կոմպոզիցիան ավելի ինքնատիպ կլինի:
Եվ, իհարկե, վերջին վրձնահարվածը կլինի խաղալիք սարդը, որը կարելի է բարակ թելով ամրացնել սարդոստայնին:
