Յուրօրինակ դեկորներ՝ հին սպասքից
Վաղ թե ուշ բոլորիս տներում էլ հավաքվում է անպետք սպասք, որից ամեն կերպ փորձում ենք ազատվել։ Սակայն պետք չէ շտապել դեն նետել հին բաժակներն ու ափսեները։ Դրանցով կարելի է ստեղծել յուրօրինակ կոմպոզիցիաներ։
Եթե կան հին սպասքից մնացած մեկ կամ երկու օրինակներ, որոնք թանկ են ձեզ համար, բայց կիրառելի չեն, առաջարկում ենք դրանք օգտագործելու մի քանի եղանակ։
Սպասքը կարելի է կիրառել որպես ջահ, որոնք յուրահատկություն կհաղորդեն խոհանոցի և ճաշասենյակի ինտերիերին։ Սպասքն ու այլ պարագաները նույնպես կարող են ծառայել որպես դեկորներ։ Գործի դրեք երևակայությունն ու գլուխգործոցներ կստեղծեք։
Հին սպասքը կարելի է օգտագործել որպես մոմակալներ, որոնք հիանալի զարդարանք կլինեն տոնական ինտերիեր ստեղծելու համար։
Տնային բույսերն ու թարմ ծաղիկներից պատրաստված ոչ մեծ ծաղկեփնջերը կարելի է տեղադրել հին սրճեփների մեջ։
Միայն բաժակները չէ, որ կարելի է կիրառել ինտերիերում։ Գեղեցիկ լուծում են նաև պատառաքաղներից ու գդալներից պատրաստված կեռիկները։ Դրանք կարող են օգտագործվել սրբիչները կախելու և այլ նպատակներով։
Ժամացույցը յուրաքանչյուր ինտերիերի պարտադիր աքսեսուարներից է։ Խոհանոցային հին սպասքից կարելի է ստեղծել յուրօրինակ ժամացույցներ կամ արդեն գոյություն ունեցող ժամացույցները վերափոխել։
Չպետք է մոռանալ, որ ցանկության դեպքում ցանկացած իր կարելի է վերածել դեկորատիվ արվեստի գլուխգործոցի։ Եվ այս դեպքում հին սպասքը բացառություն չէ։ Ափսեներից պատրաստված պատի յուրահատուկ դեկորները, կոլաժներն ու դիզայներական փորձարարությունները արթնացնում են ստեղծագործական միտքն ու օգնում ինտերիերին հաղորդել յուրօրինակ փայլ։
