Լամինատ. ճիշտ տեղադրման տեխնոլոգիա
Լամինատն ունի մի շարք առավելություններ.
- Լամինատ տեղադրելու տեխնոլոգիան շատ հեշտ է։
- Գնային առումով մատչելի է։
- Գեղեցիկ արտաքին տեսք ունի։
- էկոլոգիապես մաքուր է։
- Շատ հեշտ է մաքրվում. անհրաժեշտ է հատակը ավլել կամ փոշեկուլով մաքրել:
- Երկարադիմացկուն է։ Կախված դիմացկունության դասից և ծանրաբեռնվածությունից 3-25 տարի կարող է ծառայել։
Այս ամենի հետ զուգահեռ ունի նաև թերություններ.
- Ջրադիմացկուն չէ։ Խոնավ տարածքներում տեղադրելու համար կարերի համար հերմետիկ են օգտագործում։
- Հատակի ծածկույթը պետք է կատարյալ հարթ լինի, այլապես փականները շուտ շարքից դուրս կգան։
Անհրաժեշտ գործիքներ
Լամինատի տեղադրման համար անհրաժեշտ է՝
- անկյունաքանոն,
- մատիտ,
- չափերիզ,
- սղոց կամ մանրատամ նրբասղոց,
- մուրճ,
- սահմանափակիչներ,
- ինքնակպչուն ժապավեն` հարթակի կցակարերը կպցնելու համար,
- հարթակ,
- խոնավ տարածքների համար՝ հատուկ հերմետիկ։
Լամինատի տեղադրում
Սկզբում հարթ, չոր և մաքուր հատակի վրա հարթակ ենք դնում: Հարթակների մի քանի տեսակ կա. փրփրապոլիէթիլենային, խցանե, բիտումա-խցանե, փրփրապոլիստիրոլային և կոմբինացված (խառը)։ Հարթակներից ամենալավ տարբերակը՝ խցանե հարթակներն են, որոնք պատրաստվում են բնական ջերմահաղորդիչ նյութերով, խոնավությունից, ջերմաստիճանային փոփոխություններից չեն վախենում և չեն ձևափոխվում։
- Հարթակի շերտերը կարը կարին ամբողջ մակերեսով մեկ փռում ենք, այնուհետև կցակարերը ներկարարական ինքնակպչուն ժապավենով կպցնում, որպեսզի շերտերը չշարժվեն։
- Այժմ տեղադրում ենք լամինատը։ Սկսում ենք սենյակի այն անկյունից, որն ավելի լավ է աչքի ընկնում։ Եթե դռներն արդեն տեղադրված են և արդեն չենք կարող դրանք հանել, ապա սկսում ենք դռան մոտից։ Դռան պարակալները (наличники) լավ կլինի անմիջապես հանել, կարելի է դրանք սղոցել, որպեսզի արանքներ չմնան։ Առաջին շարքը հորիզոնական ենք շարում, որպեսզի մնացած շարքերը ևս ուղիղ լինեն։ Չափում ենք շարքի վերջին կտորը և էլեկտրական նրբասղոցով կտրում։
Ուշադրություն: Սենյակի ամբողջ պարագծով մեկ, ինչպես նաև դռների և խողովակների կողմից 1 սմ բաց ենք թողնում։ Դրա համար պատերի մոտ սահմանափակիչներ պետք է դնենք։ Ավելի ամուր կոնստրուկցիա ստանալու, կցակարերը քողարկելու համար պետք է «աղյուսի տեղադրության» սկզբունքով շարժվել, դրա համար էլ թվով զույգ շարքերը սկսում ենք ոչ թե ամբողջական տախտակից, այլ կեսից կամ մի կտորից։ Առաջին տախտակը պետք է 20 սմ-ից երկար թողնել։
- Երկրորդ շարքը շարում ենք այնպես, ինչպես առաջինը։ Զգուշորեն այդ երկու շարքերը միացնում ենք և անհրաժեշտության դեպքում մուրճով հարվածում։ Սակայն, հարվածելիս, չարժե անմիջապես լամինատի փականներին հարվածել, անպետք կտոր ենք վերցնում, և դա որպես ներդիր օգտագործում։
- Ամբողջ լամինատը տեղադրում ենք նույն սկզբունքով։ Որպեսզի լամինատը խողովակի շուրջը տեղադրենք, չափում ենք հեռավորությունը և գայլիկոնով անցքեր բացում։ Այնուհետև կտորը սղոցում ենք` հատելով գայլիկոնած շրջանագծի կենտրոնը։
- Վերջին շարքը շարելուց պտուտակամամուլ (струбцину) կամ ձեռքի տակ եղած այլ գործիքներ ենք օգտագործում։ Այնուհետև սենյակի պարագծով մեկ տեղադրում շրիշակը, որից հետո հատակի ծածկույթների փոփոխման հատվածում տեղադրում ենք շեմիկը։
Ահա և վերջ 🙂
ՀԱՏՈՒԿ ԱՌԱՋԱՐԿՆԵՐ
