Փոքր սենյակի ճիշտ ձևավորում
Բոլորն էլ կանգնել են փոքր սենյակը կահավորելու խնդրի առջև։ Ֆունկցիոնալ և կոմպակտ սենյակը փոքր բնակարաններում գերխնդիր է։ Այսօր կներկայացնենք ոչ մեծ սենյակների հետաքրքիր լուծումներ և կպատմենք՝ ինչպես մեծացնել յուրաքանչյուր դետալի ֆունկցիոնալությունը։ Իհարկե, բոլոր գաղափարները հնարավոր չէ իրականացնել մեկ ինտերիերում, սակայն դրանց մի մասը կարող եք կիրառել դիզայնի մեջ։
Ինտերիերի դիզայն. պահարաններ և պահուստավորում
Ինչպիսի՞ն պետք է լինի փոքր սենյակի կահույքը, իհարկե, կոմպակտ և ֆունկցիոնալ, իսկ գույները պետք է համապատասխանեցնել ինտերիերի ոճին։ Խորհուրդ է տրվում օգտագործել բաց երանգներ, որոնք տարածքը տեսողական կընդարձակեն։ Օգտագործեք ամբողջությամբ հայելապատ պահարան-կուպեներ, որոնք տարողունակ են և համեմատաբար ավելի քիչ տեղ են զբաղեցնում։ Կարևորը պահարանի ներսի մասը ճիշտ օգտագործելն է. բոլոր դարակներն ու կախիչների հատվածը պետք է լավ մտածված լինեն, որպեսզի բոլոր իրերը տեղավորվեն։
Պետք է շատ հայելիներ տեղադրել, որպեսզի սենյակի տարածքը տեսողականորեն մեծացնեք։ Բայց փայլուն մակերեսների հարցում պետք է զգուշ լինել։
Օգտագործեք մահճակալի, բազմոցի և պատերի վրայի ազատ տարածությունը։ Օրինակ, մահաճակալի կամ բազմոցի մեջ կարելի է տեղավորել քիչ օգտագործվող իրերը։ Պատի վրա կարող եք դարակներ ամրացնել, որպեսզի հատակին դրված պահարանների պարունակությունը տեղավորեք այդտեղ։ Սակայն տարածքը պետք չէ ծանրաբեռնել. աչքի առջև որքան հնարավոր է քիչ անպետք իրեր պետք է լինեն։
Փոքր ննջասենյակների կահույք
Փոքր ննջասենյակենրում տեղադրված մեծ կահույքը ողջ տարածքը զբաղեցնում է, դրա համար էլ կարող եք առաստաղից կախվող կամ պահարանում հավաքվող մահճակալներ օգտագործել, որոնք ցերեկը կարող եք հավաքել և տարածքն ազատել։
Շատերն, առհասարակ, հրաժարվում են մահճակալներից և օգտագործում են բազմոցներ, որոնք փոքր սենյակների համար շատ հարմար են։
Եթե սենյակը փոքր է, կարող եք երկհարկանի մահճակալներ վերցնել, որոնք թույլ են տալիս ազատ տարածքը գրագետ օգտագործել։
Ինտերիերի դիզայն. լուսավորություն
Յուրաքանչյուր ինտերիերում մեծ դեր ունի ներդաշնակ լուսավորությունը։ Մոռացեք ջահերի մասին և տարբեր գոտիների համար փորձեք ստանալ բազմաշերտ լուսավորություն։ Այն թույլ կտա սենյակում կարգավորել լույսը. երբ պետք է լույսը պայծառ է, իսկ երբ երեկոյան ֆիլմ եք դիտում կարող եք մեղմ լուսավորությունը միացնել։
Հաճախ սենյակում ուղղորդող լուսամփոփներ տեղադրելու համար օգտագործում են մեկ կամ բազմամակարդակ գիպսաստվարաթղթե և ձգվող առաստաղներ։ Բացի այդ, կարող եք օգտագործել լուսադիոդային ժապավեններ:
Գոտիավորում
Գոտիավորումը թույլ է տալիս շեշտադրումներ կատարել, ինչպես նաև տեսողականորեն տարածքը մեծացնել:
Սովորաբար գոտիավորման միջոցով մեկ սենյակում կարելի է համատեղել ննջասենյակը, աշխատասենյակը, հյուրասենյակը, իսկ երբեմն նաև խոհանոցը։
Բարձրահարթակ
Բազմաֆունկցիոնալ բարձրահարթակը տարածքը տնտեսելու և սենյակը գոտիավորելու հիանալի տարբերակ է։ Վերևում կարող է հանգստի գոտի կամ աշխատասենյակ լինել, իսկ տակը՝ տարողունակ դարակներ կամ շարժական մահճակալ։
Այս հոդվածում ներկայացրեցինք տարածքն ընդարձակելու և սենյակը ֆունկցիոնալ դարձնելու շատ հնարքներ։ Հետևեք մեր խորհուրդներին, պատրաստի լուծումները հարմարեցրեք Ձեր կարիքներին և կստանաք յուրահատուկ և պրակտիկ դիզայն։
