Վարդակի տեղադրում խոհանոցում

Խոհանոցն այն տեղն է, որտեղ էլեկտրական սարքերն ամենաշատն են օգտագործվում, ինչի պատճառով  էլ նախագծման և վերանորոգման ժամանակ պետք է մտածել վարդակների տեղադրման  մասին: Այսօր interier.am-ը կփորձի Ձեզ օգնել խորհուրդներով:

Ուշադրություն. Պետք է այնպես տեղադրել վարդակները, որպեսզի այնտեղ ջուր կամ այլ հեղուկներ չլցվեն:

Ի՞նչ պետք է հաշվի առնել վարդակներ տեղադրելիս

Ո՞ր հատվածում է տեղադրվելու խոշոր կենցաղային տեխնիկան

Սառնարանի, լվացքի մեքենայի, էլեկտրական ջեռոցի, օդակլանիչի համար պետք է վարդակներ նախատեսել, ընդ որում դրանք կարող են լինել չերևացող տեղերում, քանի որ, այդ սարքերը միացնելուց հետո, անջատելու կարիք գրեթե չի լինում:

Ո՞ր հատվածում եք օգտագործելու մանր կենցաղային տեխնիկան

Պետք է նախքան վարդակներ տեղադրելը մտածել, թե հարիչը, կոմբայնը կամ մսաղացը խոհանոցի ո՞ր հատվածում եք նախընտրում օգտագործել և ըստ այդմ վարդակների հարցում կողմնորոշվել:

Ուշադրություն. Պետք է նաև հաշվի առնել, որ սարքերի մեծամասնության լարերը կարճ են լինում:

Եթե սարքերը օգտագործելուց հետո պահարանում չեք պահելու, ապա կարող եք վարդակներն անմիջապես սարքերի հետևամասում տեղադրել:

Խոհանոցի ո՞ր հատվածում եք ավելի շատ աշխատելու

Լավ մտածեք, թե ո՞ր հատվածում է ավելի հարմար աշխատել և այդ տարածքին մոտ մի քանի հավելյալ վարդակ տեղադրեք:

Լուսավորման ի՞նչ սարքեր եք  օգտագործելու

Վարդակները տեղադրելիս, չմոռանաք նաև լուսավորման սարքերի հնարավոր տեղադրության մասին, որոնց համար ևս վարդակներ են անհրաժեշտ:

Խորհուրդ. Ժամանակակից խոհանոցային կահույքները հագեցած են հալոգենային կամ դիոդային լուսամփոփներով, որոնց վարդակները պետք է չերևացող տեղում լինեն:

Խոհանոցում հեռուստացույց նախատեսե՞լ եք, թե՝ ոչ

Եթե հեռուստացույց եք նախատեսում, ապա դրանց համար ևս վարդակներ են հարկավոր:

Խոհանոցում տարբեր գաջեթներ լիցքավորելո՞ւ եք, թե ոչ

Մեծ ընտանիքներում, երբեմն էլեկտրոնային գաջեթները լիցքավորելու համար վարդակները չեն բավականացնում, և ստիպված խոհանոցի վարդակներն են օգնության գալիս: Այնպես որ, պետք է դրանք էլ հաշվի առնել:

Քողարկվող, թաքնված և որպես շեշտադրում օգտագործվող վարդակներ

Անցնենք վարդակների ձևի ընտրությանը: Դրանք պետք է ընտրել ելնելով խոհանոցի ոճից: Վարդակները ճիշտ ընտրելով, կարող եք դրանք կամ ընդգծել կամ քողարկել՝ ստանալով անհրաժեշտ արդյունք:

Թաքնված վարդակներ

Վարդակները կարելի է տարբեր կափարիչների տակ թաքցնել, ներկառուցել դարակների մեջ, որպեսզի դրանք չերևան:

Քողարկված վարդակներ

Վարդակներն անպայման չէ քողարկել, որպեսզի դրանք շատ նկատելի չլինեն, կարելի է վարդակներն ընտրել պատերի գույնին համապատասխան և դրանք տեղադրել հորիզոնական մակերևույթներին կամ հատակին մոտիկ:

Առանձնացող վարդակներ

Այժմ շուկայում տարբեր գույնի և ձևի վարդակներ կան, որոնց շնորհիվ կարելի է նաև ինտերիերում շեշտադրումներ անել: Ժամանակակից նիկելապատ վարդակները շատ գեղեցիկ են դիտվում դասական ոճի խոհանոցում: Սև վարդակները հետաքրքիր են դիտվում հայ-տեք ոճի ինտերիերում:

Ահա և վերջ: Ընտրեք Ձեր խոհանոցին համապատասխան վարդակներ և հետաքրքիր դիզայն ստեղծեք: